Tiranë – Në kuadër të Ditës Botërore të Dhurimit të Gjakut, u zhvilluan një aktivitete sensibilizuese dhe seanca dhurimi gjaku, duke vënë në qendër mesazhin për rëndësinë e dhurimit vullnetar si një akt që shpëton jetë.
Atmosfera e aktivitetit u karakterizua nga pjesëmarrje e gjerë e përfaqësuesve diplomatikë, komunitetit të biznesit dhe qytetarëve vullnetarë. Ambasadori i Spanjës, Ambasadori i Serbisë dhe Ambasadorja e Hungarisë në Shqipëri iu bashkuan nismës duke dhuruar gjak dhe duke përcjellë një mesazh të përbashkët solidariteti dhe përgjegjësie njerëzore.
Një nga grupet më të angazhuara ishte ai i punonjësve të Hotel Marriott, të cilët përbënin numrin më të madh të dhuruesve gjatë aktivitetit. Pjesëmarrja e tyre u pa si një shembull i qartë i rolit që institucionet private mund të luajnë në mbështetjen e kauzave me ndikim të drejtpërdrejtë në komunitet.
Organizatorët theksuan se çdo njësi gjaku e dhuruar përfaqëson një mundësi reale për të shpëtuar një jetë dhe se nevoja për dhurues të rregullt mbetet e vazhdueshme në sistemin shëndetësor.
Në një tjetër aktivitet të zhvilluar po në kuadër të kësaj dite, Atlas Corporation, së bashku me kompanitë e grupit të saj – Domi Foundation, Atlas Mills, Ola Foods, Edil Centro, Besniku, Atlas Energy dhe Atlas Development – iu bashkua nismës së organizuar nga Dhoma e Tregtisë dhe Industrisë Shqipëri–Turqi (ATTSO) në bashkëpunim me Kryqin e Kuq Shqiptar.
Përfaqësues të kompanive theksuan rëndësinë e angazhimit të sektorit privat në nisma humanitare, duke e konsideruar dhurimin e gjakut si një kontribut të drejtpërdrejtë në shpëtimin e jetëve dhe forcimin e solidaritetit social.
Kryqi i Kuq Shqiptar vlerësoi mbështetjen e dhënë nga Atlas Corporation dhe kompanitë e grupit të saj, duke nënvizuar se pjesëmarrja e institucioneve, diplomacisë, biznesit dhe qytetarëve krijon një zinxhir solidariteti që shkon përtej një aktiviteti të vetëm.
Në përfundim të aktivitetit, mesazhi që mbizotëroi ishte i qartë: dhurimi i gjakut nuk është vetëm një gjest vullnetar, por një akt që çdo ditë mund të bëjë diferencën mes jetës dhe vdekjes për dikë në nevojë.